निजामती सेवा दिवस २०८३ को हार्दिक शुभकामना!

निजामती सेवा केवल रोजगारी होइन, राष्ट्र निर्माणप्रतिको जिम्मेवारी, नागरिकप्रतिको उत्तरदायित्व र सार्वजनिक विश्वासको धरोहर हो। हाम्रो ज्ञान, सीप र पदको वास्तविक मूल्य त्यसले नागरिकको जीवनमा ल्याउने सकारात्मक परिवर्तनमा प्रतिबिम्बित हुन्छ।

आजको दिन हामी सबैले आफ्नो इमानदारिता, निष्ठा, नैतिकता, सदाचारिता, निष्पक्षता, जवाफदेहिता र व्यावसायिक प्रतिबद्धतालाई अझ सुदृढ गर्ने संकल्प गर्ने दिन पनि हो। बदलिँदो समय र नागरिकका बढ्दो अपेक्षाबीच प्रशासनलाई केवल प्रक्रियामुखी होइन, परिणाममुखी, सिर्जनशील, प्रविधिमैत्री, सेवामुखी र नागरिकविश्वास जित्न सक्ने बनाउनु हाम्रो साझा दायित्व हो।

राष्ट्र परिवर्तन केवल नीति र घोषणाबाट सम्भव हुँदैन; त्यसलाई व्यवहारमा रूपान्तरण गर्ने राष्ट्रसेवकहरूको प्रतिबद्धता, क्षमता र चरित्रबाट सम्भव हुन्छ। त्यसैले हामी जहाँ छौँ, जुन भूमिकामा छौँ, त्यहीँबाट उत्कृष्ट सेवा, सही निर्णय र सार्वजनिक हितप्रतिको अटल निष्ठामार्फत राष्ट्र निर्माणमा आफ्नो योगदान बढाऔँ।

पदले होइन, हाम्रो कर्मले निजामती सेवाको गरिमा स्थापित होस्।

अधिकारले होइन, उत्तरदायित्वले हाम्रो पहिचान बनोस्।

र सेवाले नागरिकको विश्वास जितोस्।

यस पावन अवसरमा सम्पूर्ण राष्ट्रसेवकहरूमा उच्च मनोबल, व्यावसायिक उत्कृष्टता, सेवाभाव र निरन्तर प्रगतिको हार्दिक शुभकामना।

निजामती सेवा दिवस २०८३ को हार्दिक शुभकामना!

मधुरमण आचार्य

अध्यक्ष

नेपाल जन प्रशासन संघ (PAAN)

Public Administration Association of Nepal